2018想提升財運、桃花運? 12生肖話你知幸運顏色 旺足全年! (III)

猴 幸運顏色：藍色、灰白色 屬猴嘅上班一族需要謹慎處事，唔好過於進取、固執，因為今年財運麻麻地，無論你係老闆定打工仔，做野好多時都要親力親為，避免公司受到不必要嘅損失。但求學中嘅你反而讀書運唔錯！吸引新知識嘅能力比以前強，今年要應付公開考試嘅同學仔只要好好發揮，都會得到滿意嘅結果！出街帶一個藍色嘅背包就可以提升你嘅考試運啦！

另外，感情上嘅煩惱比去年多，結婚嘅夫妻可能會有爭執、不和，而戀愛中嘅你都會受到爛桃花嘅困擾，令大家關係變差。屬猴嘅女性特別要注意自己對另一半嘅態度，唔好亂發港女脾氣，造成對方壓力。建議兩人戴灰白色嘅定情信物，增進大家感情，咁就繼續甜甜蜜蜜啦！

雞 幸運顏色：灰色、米黃色 其實店主就係屬雞嘅朋友啦哈哈～今年嘅你需要默默耕耘，雖然工作上出現唔少發展機會，但要量力而為，唔可以太急進啊。另外做生意嘅你會得到貴人嘅幫助，可以朝新方面擴展事業，但要記得做好財政預算。平日著多啲米黃色嘅上衣可以增加自信心，做野就可以得心應手啦！

今年無論拍緊拖定結咗婚嘅朋友仔都要小心！因為有機會有第三者介入，破壞雙方關係。如果本身有穩定對象，就唔好因為新鮮感、外表嘅吸引力而令自己迷失方向，做出傷害另一半嘅事呀！而未有對象嘅你就可以參加多啲社交活動，或者戴灰色嘅飾物，增加自己嘅魅力！

狗 幸運顏色：紅色、紫色 雖然今年犯太歲，但運程都不算太差！喺事業方面特別有利從事紀律部隊同寫作家，有機會得到貴人嘅賞識，要好好爭取上位機會！但同事間嘅是非比較多，所以唔好太上心人哋嘅惡意批評。而讀緊書嘅你就好好進修，選擇一啲有利將來工作嘅課程，增值自己。放置紅色嘅植物喺工作枱，可以幫你趕走啲衰運！

至於感情方面亦未見有好嘅桃花緣，單身嘅你可以趁呢年好好進修，豐富知識之餘亦都可以提升你嘅內涵，吸引力自然就提高啦！有伴侶嘅朋友仔唔好因為工作而忽略另一半呀！比多啲關心、包容，先會令關係更長久～帶上紫色嘅物品就可以令你哋嘅感情更加堅固啦！

豬 幸運顏色：金色、棕色 今年有吉星陪住屬豬嘅朋友，工作上有唔錯嘅成績，發揮機會多。但做緊生意嘅就要小心投資，仔細考慮值唔值得發展新嘅產品。而人事方面就記得以和為貴，唔好同同事斤斤計較。可惜吉星扶男不扶女，所以屬豬嘅女性要保持低調、謙卑嘅心面對工作，返工可以著棕色嘅衣服嚟增添正能量嫁！

今年感情嘅方面唔太順利啊！拍拖或結婚嘅伴侶難免會出現不和，主要喺一方唔太識控制自己嘅脾氣，令雙方關係緊張，所以大家都要堅守「忍一時，風平浪靜，退一步，海闊天空」。單身嘅女性記得唔好犯公主病，嚇走對你有好感嘅對象呀！戴上閃令令金色嘅飾物，就可以加強桃花運同自身魅力啦！

呢3篇生肖運程希望可以幫到大家，祝大家有一個順利、開心、幸運嘅2018！ ＊生肖運程只作參考，命運喺要自己掌握的啊 ☺